Diaspora iu përgjigj thirrjes së Bërvenicës
Pas pjesëmarrjes në procesin zgjedhor dhe festimit të fitores në Bërvenicë, shumë mërgimtarë shqiptarë tashmë janë nisur drejt vendeve ku jetojnë në diasporë.
Ata udhëtuan nga vende të ndryshme të Evropës për të qenë në vendlindje në një moment që e konsideruan të rëndësishëm për të ardhmen e komunës. Për ta, ardhja në Bërvenicë nuk ishte vetëm një udhëtim për të votuar, por edhe një dëshmi se lidhja me vendlindjen vazhdon të mbetet e fortë.
Pas votimit dhe festës së fitores, diaspora rikthehet në vendet ku jeton, me bindjen se e përmbushi detyrimin ndaj vendlindjes.
Tashmë, përgjegjësia kalon te udhëheqja e re e komunës. Besimi i qytetarëve dhe mbështetja e diasporës pritet të shndërrohen në punë konkrete, zhvillim dhe projekte që do të ndikojnë drejtpërdrejt në jetën e banorëve.
Diaspora, e cila ndër vite ka mbështetur familjet dhe vendlindjen, pret që në të ardhmen të ketë arsye edhe më të mëdha për t’u kthyer në Bërvenicë – jo vetëm për të votuar, por edhe për të parë një komunë më të zhvilluar.
