Analistja dhe komentatorja politike Liridona Vejseli ka ngritur një pyetje që po qarkullon gjithnjë e më shumë në opinionin publik: çfarë do të ndodhë me koalicionin VLEN nëse Bilall Kasami vendos të largohet nga qeveria?
Sipas Vejselit, një veprim i tillë do të përbënte një moment kyç jo vetëm për Kasamin, por për gjithë strukturën e VLEN-it. “Nëse sot largohet Bilall Kasami… a do ta ndjekin edhe liderët e tjerë të VLEN-it?” – është dilema që ajo shtron publikisht, duke vënë në pikëpyetje unitetin dhe qëndrueshmërinë e koalicionit.
Ajo ngre gjithashtu çështjen e raportit të partnerëve shqiptarë brenda qeverisë me kryeministrin Hristijan Mickoski, duke pyetur nëse do të vazhdojnë bashkëpunimin aktual apo do të rishqyrtojnë pozicionimin e tyre politik. Në këtë kontekst, Vejseli thekson se çdo vendim eventual për largim apo qëndrim do të ketë pasoja të drejtpërdrejta në perceptimin e elektoratit shqiptar.
Debati për rolin dhe ndikimin e partive shqiptare në qeveri ka qenë i pranishëm prej kohësh, sidomos në raport me politikat që prekin çështje të ndjeshme kombëtare dhe institucionale. Një largim i mundshëm i Kasamit do të mund të hapte një kapitull të ri politik, duke testuar kohezionin e VLEN-it dhe gatishmërinë e liderëve të tjerë për të ndjekur të njëjtin hap.
