Koalicioni VLEN duket se po shkon drejt formalizimit të një modeli të ri organizimi, ku në krye të subjektit politik pritet të vendosen dy bashkëkryetarë. Ky koncept po prezantohet si një formë moderne e ndarjes së përgjegjësive dhe përfaqësimit të balancuar brenda strukturës politike.
Megjithatë, në opinionin publik dhe në qarqet politike kanë nisur të shtrohen dilema të shumta: a është ky vërtet një model i ri politik që synon bashkëpunim dhe barazi në vendimmarrje, apo një kompromis i brendshëm për të menaxhuar rivalitetet dhe ambiciet për pushtet?
Analistë dhe njohës të skenës politike vlerësojnë se modeli me dy kryetarë shpesh lind në situata kur brenda një strukture ekzistojnë disa qendra të forta ndikimi, të cilat përkohësisht gjejnë një formulë bashkëjetese për të shmangur përplasjet e hapura.
