Njëmbëdhjetë shoferë kanë përfunduar prapa grilave brenda vetëm një dite në aksione të ndryshme policore në të gjithë vendin. Sipas njoftimit të Ministrisë së Punëve të Brendshme, tetë prej tyre janë arrestuar për drejtim automjeti pa patentë shoferi, ndërsa tre të tjerë për drejtim mjeti nën ndikimin e alkoolit.
Numri më i madh i të arrestuarve është regjistruar në rajonin e Drejtorisë së Policisë në Ohër, ku janë ndaluar pesë shoferë. Në zonat e Drejtorisë së Policisë së Shkupit, Tetovës dhe Manastirit janë arrestuar nga dy shoferë.
Nga të arrestuarit në rajonin e Ohrit, tre persona janë ndaluar në Kërçovë për drejtim mjeti pa leje drejtimi, ndërsa një tjetër po në Kërçovë është kapur duke drejtuar automjetin pavarësisht një ndalimi aktiv. Ndërkohë, në Strugë një shofer, i cili ishte nën ndikimin e alkoolit, ka shkaktuar edhe aksident trafiku duke përplasur një automjet “Fiat” me “Volkswagen Golf”-in që drejtonte.
Në Shkup dhe në rajonin e Tetovës, shoferët e arrestuar janë kapur duke drejtuar automjete pa patentë shoferi, ndërsa në Manastir një shofer është ndaluar për të njëjtën shkelje, kurse një tjetër për drejtim mjeti pavarësisht ndalimit aktiv.
Nga Ministria e Punëve të Brendshme bëjnë të ditur se pas dokumentimit të plotë të rasteve do të ngrihen kallëzime penale përkatëse ndaj të gjithë personave të përfshirë.
Autoritetet gjithashtu u bëjnë thirrje qytetarëve që të respektojnë rregullat e trafikut, të mos drejtojnë automjet pa patentë shoferi, nëse kanë masë ndalimi për drejtim mjeti apo nëse janë nën ndikimin e alkoolit, në mënyrë që të kontribuohet për një trafik më të sigurt për të gjithë.
