Kryeministri i Maqedonisë së Veriut, Hristijan Mickoski, deklaroi se vendi është ndër më të avancuarit në zbatimin e reformave, duke theksuar se ndryshimet kushtetuese nuk duhet të konsiderohen si reformë.
Sipas tij, reformat nënkuptojnë përmirësimin e funksionimit të institucioneve, forcimin e sundimit të ligjit, luftën kundër korrupsionit dhe rritjen e efikasitetit të administratës publike, ndërsa ndryshimet kushtetuese janë një çështje e veçantë politike.
Mickoski theksoi se Qeveria mbetet e përkushtuar ndaj agjendës reformuese dhe realizimit të obligimeve që lidhen me procesin e integrimit evropian, por ritheksoi qëndrimin se ndryshimet kushtetuese nuk mund të paraqiten si reformë.
Deklarata e tij vjen në një periudhë kur ndryshimet kushtetuese vazhdojnë të jenë një nga temat kryesore në debatin politik dhe në procesin e negociatave të Maqedonisë së Veriut me Bashkimin Evropian.
