Grupi i Vëzhguesve “Mirko Mileski” – Kërçovë dhe Komuna e Kërçovës kanë nënshkruar një memorandum bashkëpunimi në kuadër të projektit “Rrjeti Qytetar për Ajër të Pastër në Rajonin Jugperëndimor”, i cili zbatohet nga Bashkësia e Ekologëve “Natyra” – Strugë, me mbështetjen e Qeverisë së Zvicrës përmes programit Civica Mobilitas.
Marrëveshja shënon një hap të rëndësishëm në forcimin e bashkëpunimit ndërmjet shoqërisë civile dhe vetëqeverisjes lokale për mbrojtjen e mjedisit dhe përmirësimin e cilësisë së ajrit në Kërçovë.
Në kuadër të projektit do të instalohen 30 instrumente qytetare (Klimerko) për matjen e cilësisë së ajrit në pesë komuna të Rajonit Jugperëndimor: Strugë, Ohër, Vevçan, Dibër dhe Kërçovë. Të dhënat e mbledhura do të jenë publike dhe do të shërbejnë për monitorimin më të mirë të ndotjes së ajrit.
Projekti përfshin gjithashtu trajnime për qytetarë, mësimdhënës dhe aktivistë, fushata ndërgjegjësuese, si dhe krijimin e një Këshilli Rajonal Qytetar për Ajër, me qëllim rritjen e bashkëpunimit ndërmjet institucioneve dhe komunitetit.
Ky bashkëpunim synon të rrisë pjesëmarrjen qytetare, transparencën dhe ndërmarrjen e veprimeve konkrete për një mjedis më të shëndetshëm dhe ajër më të pastër për qytetarët e Kërçovës.
