Shkup, 9 shkurt 2026 – Task-forca e të rinjve e BDI-së, e krijuar për të monitoruar aktivitetet në Çair, ka përfunduar ciklin e parë të punës, duke zbuluar atë që partia e quan “Mashtrimi i Madh”.
Sipas BDI-së, kjo task-forcë dokumentoi një “konstrukt të tërë politik” të ndërtuar mbi mashtrim dhe besimin e gabuar se qytetarët harrojnë premtimet boshe dhe tenderët fiktivë. Mes të gjeturave thuhet se projektet pa dokumentacion dhe pa asnjë financim real janë përdorur deri në ditën e zgjedhjeve.
“Premtime të rreme. Tenderë fiktivë që zgjasin deri në ditën e zgjedhjeve. Projekte pa dokumentacion dhe pa asnjë denar në buxhet. Kjo është një gjeneratë që nuk harron,” shkruan BDI në njoftimin e saj.
Task-forca, sipas partisë, do të vazhdojë punën dhe do të zgjerohet, duke sinjalizuar një përpjekje të vazhdueshme për të ekspozuar ato që e konsiderojnë praktika mashtruese në politikën lokale.
