Shkup, 14 nëntor – Derisa qytetarët përballen me shtrenjtimin e jetesës, faturat dhe shpenzimet gjithnjë e më të larta të banimit, shteti vazhdon të sigurojë nga 350 euro në muaj për qiranë e funksionarëve që kanë të drejtë ligjore për banesë zyrtare, por të cilëve nuk mund t’u sigurohet një e tillë. Një përfitues mund të marrë deri në 4.200 euro në vit nga buxheti i shtetit. Megjithatë, ajo që ngre më shumë pikëpyetje nuk është vetëm shuma e kompensimit, por mungesa e të dhënave se sa funksionarë e shfrytëzojnë këtë të drejtë dhe sa para të qytetarëve shpenzohen çdo vit për këtë qëllim, transmeton KOHA.
Vendimi për kompensimin e qirasë është miratuar në seancën e 221-të të Qeverisë, të mbajtur më 13 tetor 2026, ndërsa shuma e përcaktuar mbetet e pandryshuar. Sipas sqarimit të Zyrës së zëdhënësit të Qeverisë, kompensimi buron nga Ligji për Ekzekutimin e Buxhetit dhe arrin në 350 euro në muaj, në kundërvlerë me denarë, sipas kursit të mesëm të Bankës Popullore në ditën e pagesës.
Kjo nënkupton se një funksionar që e shfrytëzon këtë të drejtë gjatë gjithë vitit mund të përfitojë gjithsej 4.200 euro për 12 muaj, vetëm për mbulimin e shpenzimeve të qirasë. Megjithatë, kjo e drejtë nuk u takon automatikisht të gjithë funksionarëve shtetërorë. Ajo vlen vetëm për personat të cilët, në bazë të ligjit, kanë të drejtë për banesë zyrtare, por shteti nuk ka mundësi t’ua sigurojë atë.
Pikërisht këtu lind çështja e transparencës së shpenzimeve publike. Në përgjigjen e Qeverisë nuk është bërë e ditur se sa persona aktualisht përfitojnë nga ky kompensim, sa mjete ndahen çdo vit nga buxheti dhe sa banesa zyrtare ka shteti në dispozicion. Mungesa e këtyre të dhënave e bën të pamundur të përcaktohet kostoja e përgjithshme që ky kompensim ka për financat publike. Për ilustrim, nëse 100 persona do ta shfrytëzonin kompensimin gjatë gjithë vitit, shpenzimi do të arrinte në 420 mijë euro.
Në një kohë kur çdo shpenzim nga arka shtetërore kërkon arsyetim dhe llogaridhënie, mbetet e paqartë se sa i kushton buxhetit kjo e drejtë ligjore dhe nëse fondi ekzistues i banesave zyrtare shfrytëzohet në mënyrë efikase. Qeveria ka përcaktuar sa do të paguajë për secilin përfitues, por ende nuk ka bërë të ditur sa është fatura e përgjithshme që paguajnë taksapaguesit.
