Bullgaria ka ofruar të furnizojë Maqedoninë me mazut dhe të ndihmojë vendin të kapërcejë krizën në furnizimin me energji elektrike që u shpall dje nga Qeveria në të gjithë vendin
Në fakt, siç raportohet nga mediat bullgare, me urdhër të kryeministrit në largim, Rosen Zheljazkov, ministri i Energjisë Zheço Stankov inspektoi rezervat e mazutit të vendit, gjatë së cilës u përcaktua se ka sasi të mjaftueshme të mazutit në territorin e Bullgarisë për nevojat e vendit, prandaj mund t’i ofrojë Republikës së Maqedonisë së Veriut furnizime emergjente të karburantit.
“Bazuar në sasitë e mjaftueshme të përcaktuara, qeveria bullgare i ka ofruar Republikës së Maqedonisë së Veriut furnizime emergjente të karburantit me qëllim që të ndihmojë vendin në kushtet e gjendjes së jashtëzakonshme të shpallur dje”, raporton televizioni kombëtar bullgar – BNT.
Sipas mediave lokale, propozimi, me urdhër të Zheljazkovit, u bë gjatë një bisede telefonike midis ministrit të Jashtëm bullgar Georg Georgiev dhe homologut të tij maqedonas, Timço Mucunski.
Pala bullgare, siç u tha, shprehu gatishmërinë e saj për të ndihmuar në sigurimin e sasive të nevojshme të mazutit, duke respektuar mundësitë teknike dhe logjistike.
Gjatë bisedës midis Georgiev dhe Mucunskit, u theksua se ofrimi i ndihmës është shprehje e fqinjësisë së mirë dhe solidaritetit dhe se synon të sigurojë sigurinë dhe stabilitetin energjetik në rajon.
Propozimi i Bullgarisë vjen pasi Qeveria e Maqedonisë, në seancën e djeshme, me propozim të Komitetit Drejtues për Koordinimin dhe Menaxhimin e Sistemit të Menaxhimit të Krizave, miratoi vendim për ekzistencën e një situate krize në furnizimin me energji elektrike në të gjithë vendin brenda shtatë ditëve nga data e hyrjes në fuqi të vendimit.
Kompania shtetërore “Elektranat e Maqedonisë së Veriut” (EMV) javën e kaluar shkroi një letër duke i kërkuar Qeverisë të shpallë situatë krize në tregun e energjisë elektrike për shkak të bllokadave të përditshme nga fermerët grekë, të cilët po pengojnë furnizimin e energjisë së nevojshme për prodhimin e energjisë elektrike, dhe i kërkoi Qeverisë të përdorë rezervat shtetërore.
Deri më tani, nuk ka informacion nga Qeveria ose Ministria e Punëve të Jashtme dhe Tregtisë së Jashtme të Maqedonisë nëse oferta nga Bullgaria fqinje është pranuar.
Vendimi për të shpallur situatë krize në furnizimin me energji elektrike është pritur me një reagim të ashpër nga partitë opozitare në vend.
Lidhja Socialdemokrate e Maqedonisë (LSDM) dje dhe sot akuzon se situata nuk është pasojë e protestës së fermerëve grekë, por e paaftësisë së Qeverisë në menaxhimin e sektorit të energjisë në vend dhe “tenderëve kriminalë”.
Sipas partisë opozitare, vetëm në një vit e gjysmë, qeveria e udhëhequr nga Hristijan Mickoski e ka sjellë kompaninë shtetërore të energjisë “Elektranat e Maqedonisë së Veriut” (EMV) në kolaps financiar dhe prodhimi, dhe siç shtojnë ata, situata është veçanërisht shqetësuese këtë vit sepse është regjistruar historikisht prodhimi më i ulët vendas i energjisë elektrike.
Për të kapërcyer këto humbje, thotë kjo parti, qeveria po blen energji elektrike të importuar të shtrenjtë, me çmime shumë më të larta sesa do të ishte nëse EMV do ta prodhonte atë energji elektrike në vend, gjë që në fund godet xhepat e qytetarëve, të cilët do të paguajnë fatura më të larta të energjisë elektrike.
