BDI Çair prezanton platformën e raportimeve – Zeriim.mk: fund heshtjes, qytetarët raportojnë edhe anonimisht

BDI Çair ka prezantuar një platformë të re digjitale që synon të fuqizojë zërin e qytetarëve dhe të përmirësojë komunikimin me institucionet lokale.

Përmes kësaj platforme, qytetarët e Çairit do të kenë mundësi të raportojnë çdo problem që hasin në përditshmëri, duke filluar nga infrastruktura, ndriçimi publik, pastërtia, deri te çështjet administrative. Një nga veçoritë kryesore të saj është mundësia që raportimet të bëhen si me emër, ashtu edhe në mënyrë anonime.

Nga BDI Çair theksojnë se kjo nismë synon të thyejë heshtjen dhe të krijojë një urë të drejtpërdrejtë komunikimi me qytetarët, duke garantuar trajtim më të shpejtë dhe më efikas të çdo shqetësimi.

“Zëri i qytetarëve duhet të dëgjohet dhe të kthehet në veprim konkret. Kjo platformë është një hap drejt transparencës dhe përgjegjshmërisë,” thuhet në njoftim.

Kjo platformë pritet të shërbejë si një mjet modern për identifikimin dhe zgjidhjen e problemeve në kohë reale, duke kontribuar në krijimin e një Çairi më funksional dhe më të jetueshëm për të gjithë.