Deputeti i AAK-së, Daut Haradinaj, ka reaguar ashpër ndaj kryeministrit në detyrë të Kosovës, Albin Kurtit, duke e kritikuar për vizitën në Maqedoninë e Veriut dhe për promovimin e projekteve infrastrukturore që, sipas tij, janë nisur gjatë kohës kur BDI ishte në pushtet.
Haradinaj ka thënë se Kurti, në vend që të merret me përfundimin e projekteve të mëdha në Kosovë, po shkon në Maqedoninë e Veriut për t’u mburrur me projekte të nisura më herët.
“Në vend që sot të përurohej autostrada e Gjilanit dhe ajo Klinë-Gjakovë, që kanë filluar që 7 vjet, ai me kabinetin e tij shkojnë në Maqedoni për t’u mburrur me projektet e nisura sa ishte BDI në pushtet”, ka deklaruar Haradinaj.
Ai ka rikujtuar edhe premtimin për përfundimin e autostradës së Gjilanit në vitin 2023, duke kritikuar qeverinë për vonesat në realizimin e projekteve infrastrukturore.
“Hajde o zotni, e kryej punët e shtëpisë, se e more në qafë këtë vend”, është shprehur Haradinaj.
Në reagimin e tij, Haradinaj ka ngritur akuza edhe për shpenzimet e qeverisë dhe mungesën e, siç pretendon ai, rezultateve konkrete në ndërtimin e autostradave.
Në fund, ai ka ironizuar edhe një nga momentet e promovimit të punimeve, duke thënë: “Ajo lopatë me zhavor i kushtoi Kosovës 3 milionë tonë qymyr, dhuratë nga ti.”
