Tetovë – Zhvillimet politike në kampin shqiptar në Tetovë po marrin një tjetër dimension, pasi ka reaguar edhe koordinatori i Lëvizjes Demokratike në këtë qytet kundrejt deklaratave dhe qëndrimeve të fundit të Izet Mexhitit.
Në reagimin e tij publik, koordinatori thekson se qytetarët meritojnë qartësi dhe përgjegjësi politike, duke shtuar se, sipas tij, retorika e përdorur së fundmi nuk i shërben stabilitetit dhe unitetit politik në Tetovë. Ai ka nënvizuar se strukturat e Lëvizjes Demokratike mbeten të qëndrueshme dhe të përkushtuara ndaj programit të tyre politik.
Ndërkohë, burime nga terreni bëjnë të ditur se shumë aktivistë të afërt me Izet Mexhitin nga Tetova pritet të takohen në ditët në vijim me liderin e BDI-së, Ali Ahmeti. Ky takim shihet si një zhvillim me peshë në skenën politike lokale dhe mund të sinjalizojë riorganizime apo rreshtime të reja brenda spektrit politik shqiptar.
