Kompania shtetërore MEPSO, e udhëhequr nga Burim Latifi, ka kërkuar rritje prej 97,68 për qind të tarifës mesatare për transmetimin e energjisë elektrike për vitin 2027. Kërkesa, e cila vjen në një kohë kur qytetarët dhe bizneset përballen me presionin e kostove, ngre pikëpyetje për ndikimin e mundshëm të tarifave të reja në çmimin e energjisë elektrike.

Sipas dokumenteve të publikuara në faqen e Komisionit Rregullator për Energjetikë, MEPSO e ka dorëzuar kërkesën më 16 tetor, duke propozuar që tarifa mesatare për transmetimin e energjisë elektrike të përcaktohet në 0,5966 denarë për kilovat-orë.

Kjo paraqet një rritje prej 97,68 për qind krahasuar me tarifën mesatare aktuale. Kompania kërkon gjithashtu që të ardhurat bazë për vitin 2027 të përcaktohen në 2,93 miliardë denarë, ndërsa të ardhurat maksimale të rregulluara të arrijnë në 3,38 miliardë denarë.

Sipas planifikimit të paraqitur, sasia e energjisë elektrike që do të dalë nga rrjeti i transmetimit të MEPSO-s gjatë vitit 2027 parashikohet të jetë 5.677.151.958 kilovat-orë.

Edhe EMV kërkon rritje të tarifës

Përveç MEPSO-s, kërkesë për ndryshim të tarifës ka dorëzuar edhe SHA EMV, e cila kërkon rritje prej 52,7 për qind të tarifës mesatare.

Në kërkesë parashikohet që sasia e planifikuar e energjisë elektrike të shpërndarë te konsumatorët gjatë vitit 2027 të jetë 221.037.252 kilovat-orë, me tarifë mesatare prej 0,6005 denarësh për kilovat-orë.

Ndërkohë, Elektrodistribuimi ende nuk ka dorëzuar të dhënat për të ardhurat maksimale të rregulluara, pasi nuk ka përfunduar procedura e prokurimit të energjisë elektrike për mbulimin e humbjeve në rrjet.

Operatori Kombëtar i Tregut të Energjisë Elektrike, MEMO, nuk ka kërkuar ndryshim të tarifës mesatare për organizimin dhe menaxhimin e tregut të energjisë elektrike.

Bizneset në Maqedoninë e Veriut përballen me çmime të larta

Sipas të dhënave të përmendura në raportin e OECD-së për konvergjencën ekonomike në Ballkanin Perëndimor për vitin 2026, çmimi i energjisë elektrike për bizneset në Maqedoninë e Veriut gjatë viteve 2023–2024 ishte rreth 0,38 dollarë për kilovat-orë, krahasuar me 0,26 dollarë sa ishte mesatarja e Bashkimit Evropian.

Nëse kërkesat për rritje të tarifave miratohen, mbetet të shihet se çfarë ndikimi do të kenë ato në kostot e sistemit energjetik dhe në faturat përfundimtare të konsumatorëve.

Për momentin, bëhet fjalë për kërkesa të paraqitura nga kompanitë dhe jo për tarifa të miratuara përfundimisht. Vendimin për tarifat e vitit 2027 do ta marrë Komisioni Rregullator për Energjetikë.