🔴 Saranda Imeri e humb busullën në konferencë për media. “Përgjigjen do ta jap me shkrim”

VLEN-i kërkon llogari nga BDI-ja për Alta Bankën, por deputetja e tij nuk përgjigjet kur pyetet për përgjegjësinë e qeverisë!

Deputetja e VLEN-it, Saranda Imeri, është vënë përballë një pyetjeje të drejtpërdrejtë nga një gazetar maqedonas, e cila ekspozon një kundërthënie në qëndrimet publike të koalicionit qeverisës për çështjen e Alta Bankës.

Gazetari e pyeti se si është e mundur që Alta Banka dhe Davor Macura të kenë hyrë në tregun maqedonas gjatë kohës kur në pushtet janë VLEN-i dhe VMRO-DPMNE-ja, nëse pretendimi i VLEN-it është se pas kësaj skeme qëndron BDI-ja.

Me fjalë të tjera, nëse BDI-ja paska qenë përgjegjëse për këtë çështje, si shpjegohet që institucionet aktuale, të drejtuara nga koalicioni VLEN–VMRO, kanë lejuar hyrjen dhe veprimtarinë e Alta Bankës në vend?

Por, në vend që të japë një përgjigje konkrete dhe të sqarojë përgjegjësinë e pushtetit ku bën pjesë, Saranda Imeri zgjodhi t’ia delegojë përgjigjen zyrës partiake.

“Ju lutem, mundësisht përgjigjen ta merrni me shkrim nga Media Qendra e VLEN-it”, ishte përgjigjja e deputetes.

Kështu, kur bëhet fjalë për akuza ndaj BDI-së, VLEN-i nuk heziton të dalë me deklarata publike, por kur pyetet për përgjegjësinë e institucioneve që vetë i drejton, përgjigjja shtyhet për një komunikatë të ardhshme.

Ironia është se bëhet fjalë për një çështje që kërkon transparencë institucionale, jo përgjigje të përgatitura nga zyrat partiake.

VLEN-i duhet t’u përgjigjet qytetarëve: kush i lejoi procedurat për hyrjen e Alta Bankës, cilat institucione ishin përgjegjëse dhe çfarë roli kishte qeveria aktuale?

Sepse të jesh në pushtet do të thotë të mbash përgjegjësi, jo vetëm të drejtosh gishtin nga opozita!

Back To Top