Ish-kryeministri i Maqedonisë së Veriut, Nikolla Gruevski, ka reaguar ashpër ndaj ministrit të Drejtësisë pas paralajmërimeve për procedurë të re ekstradimi nga Hungaria, duke akuzuar ish-qeverinë e Lidhja Social Demokrate e Maqedonisë dhe ish-kryeministrin Zoran Zaev për “përndjekje politike”, procese të montuara gjyqësore dhe presione mbi sistemin e drejtësisë.
Në reagimin e tij publik, Gruevski tha se ministri po merret me mbledhjen e dokumenteve për ekstradimin e tij, në vend që, sipas tij, të hetojë “keqpërdorimet dhe paligjshmëritë” gjatë periudhës së qeverisjes së LSDM-së.
“Po e shoh dhe po pyes veten kush është në pushtet në Maqedoni. Duke parë nga jashtë, nuk duket fare sikur LSDM-ja e Zaevit me urrejtjen dhe metodat e saj të pista është larguar nga pushteti”, shkroi Gruevski.
Ai pretendon se gjatë qeverisjes së Zaevit janë hartuar lista politike për ndjekje penale të kundërshtarëve, ndërsa dëshmitarët dhe të akuzuarit, sipas tij, janë përballur me kërcënime dhe shantazhe për të dhënë deklarata të rreme.
Gruevski akuzon gjithashtu se gjykatësit kanë qenë nën presion politik për të marrë vendime të caktuara, duke përmendur rastet gjyqësore ndaj tij si “Tanku”, “Parcelat në Vodno”, “Dhuna në Qendër” dhe procedurat për autostradën Kërçovë–Ohër.
Sipas tij, vendimet gjyqësore janë bazuar në “supozime të rreme” dhe jo në prova konkrete, ndërsa ai mohon të ketë përfituar personalisht nga rastet për të cilat është dënuar.
Në reagim, ish-kryeministri iu referua edhe deklaratave publike të ish-prokurores së PSP-së, Lejla Kadriu, dhe ish-gjykatësit suprem Risto Katavenovski, duke pretenduar se ato dëshmojnë për ndikim politik të pushtetit të atëhershëm mbi sistemin gjyqësor.
“Një ditë, e gjithë kjo do të arrijë edhe te Bashkimi Evropian. Kjo parodi e sistemit të drejtësisë në Maqedoni do të shihet nga këndi i vërtetë”, shkroi Gruevski.
Ai i bëri thirrje ministrit të Drejtësisë që, para se të veprojë për ekstradimin e tij, të analizojë rrethanat politike dhe juridike në të cilat, sipas tij, janë zhvilluar proceset gjyqësore kundër tij gjatë viteve të qeverisjes së LSDM-së.
