Gazetari Lirim Mehmetaj ka reaguar ndaj deklaratës së presidentes së Kosovës, Vjosa Osmani, e cila tha se deri më tani janë rreth 20 raste kur Qeveria e Kosovës ka shkelur Kushtetutën.
Mehmetaj ngre pyetjen pse ky reagim nga ana e presidentes po vjen vetëm tani, kur sipas saj vetë numri i shkeljeve është kaq i madh. Ai thekson se nëse vërtet kanë ndodhur rreth 20 shkelje të Kushtetutës, atëherë lind dilema pse institucioni i Presidencës nuk ka reaguar më herët dhe pse këto çështje nuk janë ngritur publikisht në momentin kur kanë ndodhur.
Sipas gazetarit, deklarata e presidentes hap debat për rolin që duhet të ketë kreu i shtetit në mbrojtjen e rendit kushtetues, sidomos kur bëhet fjalë për veprime të qeverisë që mund të bien ndesh me Kushtetutën.
Kujtojmë se presidentja Osmani deklaroi se ekzistojnë rreth 20 raste ku, sipas saj, qeveria ka bërë shkelje kushtetuese, duke shtuar se këto çështje janë trajtuar në mënyra të ndryshme institucionale. Megjithatë, deklarata e saj ka nxitur reagime dhe pyetje në opinionin publik lidhur me kohën dhe mënyrën e reagimit të Presidencës.
