Shkup – Një tjetër skandal me përmasa shqetësuese po del në pah në institucionet shtetërore, këtë herë në Burgun e Shutkës, ku sipas informacioneve të siguruara, nga punësimet e fundit rezulton një pabarazi e theksuar etnike.
Nga gjithsej 22 të punësuar, plot 20 janë maqedonas, ndërsa vetëm 2 janë shqiptarë. Ky raport ka nxitur reagime të forta në opinion, duke u cilësuar si diskriminim i hapur dhe përjashtim i turpshëm ndaj shqiptarëve, të cilët në mënyrë të vazhdueshme po mbeten jashtë institucioneve publike.
Burime jozyrtare bëjnë të ditur se procesi i përzgjedhjes nuk ka reflektuar përfaqësim të drejtë dhe proporcional, duke ngritur dyshime serioze për politizim dhe favorizim në baza etnike.
Njohës të çështjeve juridike dhe të barazisë paralajmërojnë se praktika të tilla bien ndesh me parimet kushtetuese dhe ligjore për përfaqësim të barabartë, si dhe me frymën e bashkëjetesës ndëretnike në vend.
Nga ana tjetër, deri më tani mungon një reagim i qartë nga institucionet përgjegjëse për këtë çështje, ndërsa qytetarët kërkojnë transparencë dhe llogaridhënie për këtë proces të dyshimtë.
Ky rast shihet si një tjetër dëshmi e krizës së përfaqësimit dhe si një alarm për nevojën urgjente të garantimit të barazisë në punësim në të gjitha nivelet e administratës publike.
