Vendimi i fundit i Këshillit të Komunës së Çairit për të miratuar një kredi prej 150 milionë denarësh për Komunën e Sarajit ka shpërthyer si një skandal i vërtetë në opinionin publik. Në kohën kur qytetarët e Çairit përballen me mungesë të theksuar investimesh në çerdhe, shkolla dhe infrastrukturë bazë, drejtuesit komunalë japin “dritë jeshile” për borxhe që nuk lidhen drejtpërdrejt me nevojat e tyre.
Kjo situatë ka hapur kritika të forta ndaj koalicionit VLEN dhe rolit të Izet Mexhiti, duke ngritur pyetjen nëse prioritetet janë zhvendosur larg interesit të qytetarëve të Çairit. Për shumëkënd, është e pakuptimtë se si një komunë që përballet me mungesë fondesh për projekte elementare arrin të përfshihet në procese që lidhen me financimin e një komune tjetër.
Kritikët theksojnë se mungesa e investimeve në arsim dhe kujdes për fëmijët është bërë problem kronik në Çair, ndërsa vendime të tilla vetëm sa thellojnë pakënaqësinë. Ata kërkojnë transparencë të plotë: mbi çfarë baze merret ky vendim dhe kush mban përgjegjësi nëse kjo barrë financiare kthehet në problem për buxhetin e komunës.
Nga ana tjetër, deri tani mungon një sqarim i detajuar nga autoritetet për arsyet konkrete të këtij angazhimi financiar dhe përfitimet reale për qytetarët e Çairit.
