Vazhdojnë reagimet dhe akuzat publike për mënyrën e shpërndarjes së kontratave dhe angazhimeve në institucione publike, ku ngrihen dyshime për përfitime të shumëfishta nga të njëjtit individë.
Sipas pretendimeve që po qarkullojnë në opinion, një person dyshohet se ka kontrata të njëkohshme në Komunën e Sarajit, Komunën e Tetovës dhe në një ministri, gjë që ka ngritur pikëpyetje mbi mënyrën se si menaxhohen angazhimet dhe a respektohen procedurat ligjore për punësim dhe kontraktim.
Këto akuza kanë nxitur reagime të ashpra nga opinioni, ku qytetarët dhe aktivistët pyesin se si është e mundur që një individ të mbajë disa kontrata njëkohësisht në institucione të ndryshme publike, ndërkohë që shumë të tjerë mbeten pa mundësi punësimi.
Ndërkohë, kritikët theksojnë se kjo situatë tregon mungesë transparence dhe favorizim në ndarjen e kontratave publike, duke rritur pakënaqësinë tek aktivistët dhe qytetarët që kërkojnë trajtim të barabartë.
Institucionet përkatëse ende nuk kanë dhënë një sqarim zyrtar lidhur me këto pretendime.
