TRI FIGURAT E MËDHA POLITIKE QË E VIZITUAN NËNËN E UÇK-SË, STANË PJETËR GASHIN

Dy vite nderime, vizita dhe mirënjohje për gruan që gjatë luftës së UÇK-së hapi dyert e shtëpisë së saj për luftëtarët e lirisë

Nga 8 shtatori 2024 deri më 8 shtator 2026 janë bërë dy vite të plota, gjatë të cilave Nënë Stanë Pjetër Gashi është nderuar me vizita, mirënjohje, dekorata dhe aktivitete të shumta shtetërore, kombëtare, kulturore e fetare.

Nënë Stana është bërë tashmë një nga figurat e njohura të historisë së luftës së Ushtrisë Çlirimtare të Kosovës. Gjatë viteve 1998–1999, ajo së bashku me familjen e saj i hapi dyert e shtëpisë luftëtarëve të UÇK-së, duke u ofruar ushqim, strehim dhe kujdes, ndërsa u pastronte e qepte rrobat dhe u ndihmonte në mjekimin e plagëve.

Për kontributin e saj, ajo është nderuar nga institucione shtetërore e lokale të Kosovës, nga Organizata e Veteranëve të Luftës së UÇK-së dhe nga Kisha Katolike Shqiptare e Kosovës.

Tri figurat politike që e vizituan në shtëpinë e saj

Gjatë viteve 2025 dhe 2026, në Shtëpinë Bazë të UÇK-së, te Nënë Stana, kanë shkuar personalitete të shumta politike, ushtarake, fetare, kulturore dhe mediatike.

Në mesin e tyre veçohen Presidentja e Kosovës, Vjosa Osmani, udhëheqësi politik shqiptar Ali Ahmeti dhe Kryetari i Prishtinës, Përparim Rama.

Presidentja Vjosa Osmani e vizitoi Nënë Stanën së bashku me familjen e saj. Ajo më pas e nderoi me Dekoratën Presidenciale “Shën Tereza”, në shenjë vlerësimi për kontributin e saj gjatë luftës.

Në vitin 2026, Nënë Stanën e vizitoi edhe Ali Ahmeti, një prej figurave të njohura të historisë politike dhe të luftërave çlirimtare shqiptare. Vizita e tij në Shtëpinë Bazë të UÇK-së te Nënë Stana u cilësua si një tjetër moment i veçantë në serinë e vizitave dhe nderimeve.

Ndërkohë, Nënë Stana është vizituar edhe nga Përparim Rama, Kryetar i Kryeqytetit, i cili së bashku me bashkëshorten e tij dhe përfaqësues të Komunës së Prishtinës ka qëndruar në shtëpinë e saj.

Rama e ka nderuar Nënë Stanën edhe me dekoratën “Hyjnesha në Fron”.

Dhjetëra vizita dhe nderime

Përveç këtyre figurave, gjatë vitit 2025 Nënë Stanën e kanë vizituar edhe komandantë të UÇK-së, kryetarë komunash, përfaqësues të institucioneve fetare, shkrimtarë, këngëtarë dhe gazetarë.

Në mesin e tyre janë Ahmet Isufi, Shemsi Syla, Rustem Mustafa, Liburn Aliu, Alban Hyseni, Imri Ahmeti, Smajl Latifi, Bajrush Ymeri, Nusret Pllana, Adem Shehu, Ibrahim Kadriu, Arben Krasniqi dhe shumë personalitete të tjera.

Gjatë kësaj periudhe, Nënë Stana është nderuar me 13 dekorata dhe mirënjohje, ndërsa në Shtëpinë Bazë të UÇK-së janë vendosur edhe dy pllaka përkujtimore.

Komuna e Gjilanit, në shenjë respekti për familjen Gashi dhe kontributin e saj, ka vendosur edhe emrin e kryefamiljarit të Shtëpisë Bazë të UÇK-së, Ndue Martin Gashi, në një rrugë të qytetit.

Nga kronikat televizive te dokumentarët dhe këngët

Figura e Nënë Stanës është pasqyruar gjerësisht edhe në mediat e Kosovës. Gjatë viteve 2025–2026 janë realizuar kronika dhe emisione televizive nga RTK, Klan Kosova, TV21, RTV Dukagjini dhe KTV, ndërsa për të janë realizuar edhe dokumentarë të veçantë.

Për Nënë Stanën janë shkruar edhe këngë nga autorë e artistë shqiptarë, ndërsa këngëtarë si Shkodran Tolaj, Gjon Frroku dhe Arben Krasniqi i kanë kushtuar dhe interpretuar këngë.

Shkrimtari Ibrahim Kadriu i ka kushtuar gjithashtu një libër figurës së Nënë Stanës.

Bilanci i dy viteve

Sipas bilancit të aktiviteteve të evidentuara, gjatë këtyre dy viteve Nënë Stanë Pjetër Gashi është bërë pjesë e:

• 27 vizitave të personaliteteve të njohura në Shtëpinë Bazë të UÇK-së;
• 13 nderimeve me dekorata e mirënjohje;
• 11 emisioneve dhe kronikave televizive;
• 2 dokumentarëve;
• 11 ftesave për pjesëmarrje në institucione dhe aktivitete;
• 1 emërtimi rruge;
• 5 këngëve të shkruara për të;
• 3 këngëve të interpretuara;
• 1 libri të shkruar për figurën e saj.

Kjo seri vizitash dhe nderimesh, sipas familjes Gashi, dëshmon se kontributi i Nënë Stanës gjatë luftës së UÇK-së vazhdon të kujtohet dhe të vlerësohet nga institucione, personalitete dhe qytetarë.

Gazeta “Epoka e Re” ka pasqyruar në vazhdimësi aktivitetet e zhvilluara në Shtëpinë Bazë të UÇK-së të Nënë Stanës dhe djemve të saj, Filip, Fatmir dhe Viktor Gashi, ish-ushtarë të UÇK-së.

Prishtinë, 8 shtator 2026
Ismet Sylejmani