Pakënaqësi të konsiderueshme po shfaqen brenda strukturave dhe aktivistëve të Lëvizja Demokratike, të udhëhequr nga Izet Mexhiti, lidhur me procesin e shkrirjes së partive të koalicionit VLEN në një subjekt të vetëm politik.
Burime brenda partisë i kanë thënë portalit Ontarget.mk se një pjesë e madhe e strukturave nuk janë të kënaqura me modelin e ndarjes së përgjegjësive dhe të “hises” qeveritare, që sipas tyre është konceptuar në pesë pjesë të barabarta – nga 20 për qind për secilin subjekt politik të koalicionit.
Sipas këtyre burimeve, ky model po perceptohet nga një pjesë e anëtarësisë si i pafavorshëm për Lëvizjen Demokratike, duke pasur parasysh peshën politike dhe organizative që partia pretendon se ka brenda koalicionit.
Ndërkohë, edhe pse procesi i shkrirjes së VLEN-it në një parti të vetme ende nuk është finalizuar, liderët e koalicionit po vazhdojnë me përgatitjet për këtë hap.
Kryetari i Lëvizja Besa, Bilall Kasami, deklaroi një ditë më parë se partnerët e koalicionit janë në pritje të qëndrimit të partisë Alternativa për të finalizuar procesin e bashkimit në një parti të vetme politike.
Sipas Kasamit, synimi është që subjekti i ri të funksionojë me dy kryetarë, një model drejtues që pritet të formalizohet pas përmbylljes së negociatave mes partnerëve të koalicionit.
Megjithatë, pakënaqësitë e raportuara brenda strukturave të Lëvizjes Demokratike tregojnë se procesi i bashkimit mund të përballet me sfida të brendshme, ndërsa pritet që në javët në vijim të qartësohen edhe detajet përfundimtare të organizimit dhe drejtimit të subjektit të ri politik.
