Meta del nga qelia për t’i dhënë lamtumirën e fundit babait të tij

Kreu i Partisë së Lirisë, njëherë edhe ish-presidenti i Shqipërisë, Ilir Meta ka mbërritur në fshatin Çepan të Skraparit për të marrë pjesë në ceremoninë mortore të babait të tij, i cili ndërroi jetë një ditë më parë. Kreu i PL-së takoi banorët e mbledhur për t’i dhënë lamtumirën e fundit Rexhep Metës.

Në këtë ceremoni marrin pjesë sekretari i përgjithshëm i PL-së, Tedi Blushi, ish-deputeti Lefter Maliqi, botuesi Fahri Balliu dhe të tjerë.

Meta la ambientet e burgut “313” nën shoqërimin e Policisë së Burgjeve, sot në orën 07:00 të mëngjesit, për të marrë pjesë në ceremoninë e lamtumirës së babait të tij, Rexhep Meta.

Leja e përkohshme iu dha për t’i mundësuar pjesëmarrjen në ceremoninë mortore familjare, ndërsa gjatë gjithë kohës ai shoqërohet nga efektivë të Policisë së Burgjeve, sipas procedurave ligjore në fuqi.