Gjykata Kushtetuese e Maqedonisë së Veriut ka marrë në shqyrtim kërkesën e paraqitur nga Paçuku,e cila ka të bëjë me zbatimin e barabartë të projektit Safe City në të gjithë territorin e vendit.
Sipas kërkesës, Paçuku pretendon se projekti, i cili parashikon vendosjen e kamerave dhe teknologjisë për monitorimin e trafikut dhe sigurinë publike, duhet të zbatohet në mënyrë të njëjtë në të gjitha qytetet dhe komunat, pa përjashtime apo trajtime të ndryshme.
Në parashtresë theksohet se zbatimi selektiv i këtij sistemi mund të krijojë pabarazi mes qytetarëve dhe komunave, sidomos në aspektin e kontrollit të trafikut dhe vendosjes së gjobave. Për këtë arsye kërkohet që institucionet përgjegjëse të sigurojnë standarde të njëjta për të gjithë.
Nga Gjykata Kushtetuese e Maqedonisë së Veriut njoftuan se kërkesa është pranuar për shqyrtim dhe se gjykatësit do të analizojnë nëse ekzistojnë elemente që cenojnë parimin kushtetues të barazisë së qytetarëve para ligjit.
Vendimi i gjykatës pritet të qartësojë nëse projekti Safe City duhet të zbatohet me të njëjtat kritere në të gjitha rajonet e vendit ose nëse institucionet mund të përcaktojnë prioritete sipas nevojave lokale.
